Greiðsluaðlögun

Greiðendur eða námsmenn sem hyggjast sækja um greiðsluaðlögun eða hafa þegar sótt um, ættu að hafa nokkur atriði í huga varðandi námslánin.

Þeir greiðendur sem sóttu um greiðsluaðlögun fyrir 1. júlí 2011 fóru í greiðsluskjól strax og Umboðsmaður skuldara hafði formlega móttekið umsókn um greiðsluaðlögun.

Greiðsluskjól þýðir að LÍN hættir öllum innheimtuaðgerðum þar til niðurstaða er komin í málið.

Þeir sem hafa sótt um greiðsluaðlögun frá og með 1. júlí 2011 eru ekki í greiðsluskjóli fyrr en að umsókn þeirra hefur verið samþykkt.

Ef greiðendur sóttu um eftir 1. ágúst 2010 og fá greiðsluaðlögun samkvæmt ákvörðun Umboðsmanns skuldara (falla sem sagt undir nýju lögin um greiðsluaðlögun einstaklinga nr. 101/2010), verða námslán ekki felld niður eða lækkuð samkvæmt samningnum.

Hins vegar er heimilt að frysta námslánin meðan á greiðsluaðlögun stendur en það yrði þá hluti af samkomulaginu við kröfuhafa.

Ef greiðendur sóttu um fyrir 1. ágúst 2010 og fengu greiðsluaðlögun samkvæmt úrskurði Héraðsdóms, er mjög mikilvægt að greiðendur muni að það er á ábyrgð hvers og eins að sjá til þess að greiðslur skili sér til LÍN samkvæmt samningnum.

Greiðslurnar þurfa að berast á réttum tíma og vera uppreiknaðar miðað við vísitölu ef samningurinn kveður á um það.

Greiða má inn á reikning sjóðsins númer: 111-26-205, kt. 710169-0989.

Verði ekki staðið við samninginn af hálfu greiðanda, getur LÍN gert kröfu um riftun eða ógildingu samningsins. Verði samningnum rift eða hann ógiltur, mun það þýða að niðurfelling hluta námslána eða aðrar tilslakanir munu ganga til baka.

Til athugunar fyrir umsækjendur um námslán:

Námsmenn með virka umsókn um greiðsluaðlögun eða samning um hana, verða að hafa í huga að námslán fást ekki greidd út hjá sjóðnum ef eldri lán eru í vanskilum.

Einnig þurfa umsækjendur um námslán að útvega ábyrgð á lánið ef þeir eru á vanskilaskrá, venjulega einn ábyrgðarmann.

Þetta gildir um umsækjendur um greiðsluaðlögun eins og aðra.